नेपाल कम्युनिस्ट पार्टीको पहलमा ४ बर्षिया मनसराको उपचार शुरु « Himal Post | Online News Revolution
Logo

नेपाल कम्युनिस्ट पार्टीको पहलमा ४ बर्षिया मनसराको उपचार शुरु



मानध्वज लामा\ काठमाडौं, २३ जेठ

 

गत आइतबार आँखा विस्फोट भई सिकिस्त बिरामी परेकी रोस्कोट नगरपालिका–७, कालिकोटकी चार बर्षीया बालिका मनसरा लुहारको उपचार कान्ति बाल अस्पतालमा शुरु भएको छ ।  स्थानीय स्तरमा उपचार असम्भव भएपछि थप उपचार गर्न नेपाल कम्युनिस्ट पार्टी र सामाजिक अगुवा, युवा पंक्तिको सहयोगमा पैदल र गाडीको दुई दिनको लामो यात्रापश्चात बाबु रने लुहार र अगुवा कालीबहादुर महतराले छोरीलाई मंगलबार अपरान्ह काठमाडौं ल्याइपु¥याएका हुन् ।

महाराजगन्जस्थित बीपी आँखा अस्पतालमा आँखाको परिक्षणलगत्तै उपचारका लागि मनसरालाई कान्ति बाल अस्पतालको इमर्जेन्सी कक्षमा भर्ना गरिएको छ । भर्नाअगाडि छोटो समय लिएर पत्रकार सम्मेलन गरेर बिरामीको आर्थिक अवस्थाबारे बाबुले जानकारी दिएका छन् ।

चरम आर्थिक अभावबाट गु्रजिरहेका रने परिवारले छोरी बचाउन सबैसँग सहयोग गर्न अपिल गरेको छ । दुई महिनापहिले घरनजिकै नहरमा खसेर सामान्य चोट लागेका मनसराको दाहिने आँखा आर्थिक संकटकै कारण थप उपचार गर्न नसकिरहेको बाबु रने लुहारले पत्रकार सम्मेलनमा जानकारी दिए । अभावकै कारण छोरीको स्वास्थ्यले जटिल रुप लिएको उनले बताए ।

चोट लागेको करिब दुई महिनापछि आइतबार घाइते आँखा एक्कासी विस्फोट भई बाहिर निक्लियो । त्यसबाट स्वास्थ्यवास्था गम्भीर बनेपछि स्थानीयको सहयोगमा मनसरालाई सदरमुकाम मान्मा पु¥याइयो । त्यहाँ उपचार सम्भव नभएपछि नेपाल कम्युनिस्ट पार्टीका नेता एवं स्थानीय भरत बम ‘रणवीर’सहितको टोलीले बिरामीलाई काठमाडौं ल्याइपु¥याइएको हो ।

मनसराको उपचारप्रति राज्य उदासिन हुन नमिल्ने बताउँदै उपचारका लागि सहयोग गर्न देशभित्र र बाहिर रहेका सम्पूर्ण नेपालीहरुसँग नेता रणवीरले अपिल गरे । नेपालीहरुकै सहयोगबाट मनसराको उपचार सफल बनाउनुपर्नेमा उनले जोड दिए । ‘हामी नेपालीको सहयोगलाई प्राथमिकता दिन्छौं । लुहारजस्ता चरम गरिबीको चंगुलमा पारिएकाहरुको उद्धार गर्न नेपाल कम्युनिस्ट पार्टी सदैव साथमा छ’ उनले भने । त्यसनिम्ति मनसरा संरक्षण कोष स्थापना गरिएको छ । संकलित रकम कोषमार्फत बिरामीको उपचारमा खर्च गर्ने र मनसरा जस्तै वर्गको उपचारमा निरन्तर लगाउने पत्रकार सम्मेलनमा जानकारी दिइयो ।

SANYO DIGITAL CAMERA

पत्रकार सम्मेलनमा बाबु रनेले भावकु हुँदै भने ‘मेरो छोरीलाई बचाउनु छ, तपाईहरुले सहयोग गर्नुस् ।’ स्थानीय अगुवा महतराले मनसराको परिवार चरम गरिबीको चपेटामा गुज्रिएको र छोरीलाई बचाउन सबैको सहयोग खाँचो रहेको बताए । सुर्खेतबाट काठमाडौं आउन वीरेन्द्रनगरमा पत्रकार सम्मेलन गरी खर्च जुटाएर काठमाडौं ल्याइपुर्याउन सकिएको महतराले बताए ।

सहयोग जम्मा गर्न मनसराकी बाबु र महतराको नाममा सानिमा बैंकका संयुक्त खाता खोलेको छ । सहयोग गर्न इच्छुक महानुभावलाई उक्त बैंक खातामा सिधै रकम जम्मा गर्न सकिने जानकारी पनि महतराले दिए । खाता नम्बर ०४४००००००१० रहेको छ । आवश्यक सम्पर्कको लागि महतराको मोवाइल नम्बर ९८४८३०७१७३ दिइएको छ ।

बिरामीको उपचार चिकित्सक प्रकाशनिधी तिवारीको टोलीले गरिरहेको चिकित्सक प्रकाश न्यौपानेले जानकारी दिए । आँखाको भित्री भागसहित ठूलो साइजमा ट्युमर बाहिर निक्लिएको छ । (हेर्नुस् तस्बिर) । मनसराको केश विश्वमै दुर्लभ भएको चिकित्सकको भनाई छ । मेडिकल भाषामा मनसरामा देखिएको केश ब्लास्ट अर्थात विस्फोट भएको अखिल नेपाल जनस्वास्थ्यकर्मी महासंघका अध्यक्ष डम्बर रावलले बताए । ‘क्यान्सर भइसकेको अवस्थामा ब्लास्ट हुन्छ’ अध्यक्ष रावलले भने ।

पत्रकार सम्मेलनमा धादिङ स्वास्थ्यमा समाजका डा. राम थापा क्षेत्रीले बालिकाको उपचारका लागि आफूहरुले सक्दो सहयोग गर्ने बताए । अखिल नेपाल जनस्वास्थ्यकर्मी महासंघका केन्द्रीय सदस्य लोकेश जोशीले मनसराको जीवन बचाउन सबैको सहयोग आवश्यक रहेको बताए ।

५० वर्षीय लुहारका तीन छोरी र तीन छोरा छन् । मनसरा कान्छी सन्तान हुन् । श्रीमती धनञ्जना लुहार गाउँमै मजदुरी गर्छिन् । अभावकै कारण मनसरालाई विद्यालय पठाउन सकेका छैनन् । बिरामीको उपचार निकै जोखिम र लाखौं रुपैयाँ खर्च लाग्ने किसिमको रहेको चिकित्सकको भनाई छ ।