भ्रामक समाचारमा “स्क्रीनसट” बनाउनेविरुद्ध निर्वाचन आयोगमा उजुरी
विभिन्न समाचार पोर्टलका मास्टरहेड प्रयोग गरी प्रकाशित नै नभएका समाचारका स्क्रिनसर्ट प्रयोग गरी भ्रामक हल्ला फैलाइएपछि निर्वाचन आयोगमा कारबाहीका लागि उजुरी परेको छ ।
शनिबार विभिन्न समाचार पोर्टलका मास्टरहेड र समाचार जोडर फेसबुकमार्फत फैलाइएको थियो । नयाँपत्रिकाका संवाददाता कमलराज भट्टले आयोगमा उजुरी दिएका हुन् । उनको बाइलाइनमा भ्रामक समाचारको स्क्रिनसर्ट भाइरल बनाइएको छ ।
उनले आयोगललाई दिएको उजुरीमा लेखेका छन्, उपरोक्त सम्बन्धमा मंसिर ४ को प्रतिनिधि सभा तथा प्रदेश सभा निर्वाचन लागि लागू गरिएको निर्वाचन आचारसंहिता २०७९ मा मित्थ्या र भ्रामक सूचना तथा दुष्प्रचार गर्न नपाइने व्यवस्था गरिएको छ । मतदानको ४८ घण्टाअघिदेखि स्थिर समय (मौन अवधि) लागू गरिएको छ । यसमा कुनै पनि प्रचार गर्न पाइँदैन ।
तर आचारसंहिताको उल्लेखित व्यवस्था र मौन अवधिमा कुनै प्रचार गर्न नपाइने व्यवस्था विपरीत अज्ञात समूहले प्रविधिको दुरुपयोग गरी सञ्चारमाध्यममा प्रकाशन नै नभएको सामग्री सोर्स कोड परिवर्तन गरेर भ्रम फैलाउने उद्देश्यले स्क्रिनसट गरेर दुष्प्रचार गरिरहेका छ ।’
उनले अगाडि लेखेका छन्, ‘म आबद्ध नयाँ पत्रिका दैनिकको अनलाइनमा प्रकाशित नै नभएको सामग्रीलाई माओवादीलाई भोट नदिन कांग्रेसको सर्कुलर आपत्तिजनक : प्रचण्ड शीर्षक दिएर नयाँ पत्रिकामा प्रकाशित जस्तो बनाई र मेरो बाइलाइन प्रयोग गरि दुष्प्रचार गर्ने तथा चरित्रहत्या गर्ने कसूर भएकाले प्रचलित कानुन बमोजिम दोषीमाथि कारवाही गरिपाउँ भनी यो निवेदन पेश गरेको छु ।’