अफ्रिकाका पूर्वराष्ट्रपति १५ महिना जेल चलान: संबैधानिक अदालतले सुनायो फैसला « Himal Post | Online News Revolution
Logo

अफ्रिकाका पूर्वराष्ट्रपति १५ महिना जेल चलान: संबैधानिक अदालतले सुनायो फैसला



काठमाडौं- अदालतको अवहेलना गरेको भन्दै दक्षिण अफ्रिकाका पूर्वराष्ट्रपतिलाइ १५ महिना जेल सजाय तोकिएको छ । त्यहाँको संवैधानिक अदालतले पूर्वराष्ट्रपति ज्याकोब जुमालाई जेल सजाय हुने फैसला सुनाएको छ।

दोषी ठहर गर्दै संबैधानिक अदालतले जुमालाई जेल सजाय तोकेको हो । संबैधानिक अदालतका न्यायाधीश सिसि खाम्पेपेले अदालतको निर्णय सुनाएका थिए। अदालतले जुमालाई एन्कान्डला वा जोहानेसबर्गको प्रहरी चौकीमा पाँच दिनभित्र स्वयं उपस्थित हुन पनि आदेश दिएको छ । जुमाका निवास एन्कान्डला र जोहानेसबर्ग दुबै ठाउँमा रहेका छन्।

जुमाले प्रहरीमा स्वयं उपस्थित नभएर अटेर गरेमा दक्षिण अफ्रिकी प्रहरी मन्त्री भेकी सिलेले तीन दिनभित्र आवश्यक व्यवस्था गरी जुमालाई सुधार गृहमा पठाउन पनि आदेश दिएको छ।पूर्वराष्ट्रपति जुमाले राज्य आयोगमा उपस्थित भएर बयान दिन अदालतले दिएको आदेश इन्कार गरेको भन्दै मानहानिको मुद्दा चलाइएको हो।

सन् २०१८ मा गठन भएको यस आयोगले जुमा बिरुद्ध राज्यको शक्तिमाथि हस्तक्षेप गरेको, भ्रष्टाचार गरेको तथा राज्यका स्रोतसाधनको दुरुपयोग गरेको अभियोगमा छानबिन गरिरहेको छ।

गत फेब्रुअरीमा पनि जुमालाई आयोगमा उपस्थित हुन भनिएको थियो तर उनले उपस्थित हुन अस्वीकार गर्दै आएका थिए। जुमाले आयोगका अध्यक्ष एवं न्यायाधीश रेमन्ड जोन्डोका कार्यहरु आफू विरुद्ध पक्षपातपूर्ण रहेको दाबी गर्दै आएका थिए।