लकडाउन पालना नभएपछि बाँकेमा निषेधाज्ञा, कर्णालीमा सेना परिचालन तयारी

काठमाडौं- व्यापक रुपमा फैलिएको कोरोना संक्रमणको कारण अवस्था नियन्त्रण बाहिर जान थालेपछि स्थानीय प्रशासनले बाँकेमा अनिश्चितकालिन निषेधाज्ञा जारी गरेको छ।

बुधबार राति १० बजेदेखि लागू हुने गरी जिल्लाभरी अनिश्चितकालीन निषेधाज्ञा जारी गरिएको जिल्ला प्रशासन कार्यालय बाँकेले जनाएको छ।

बाँके जिल्लामा अहिलेसम्म एक सय ७० जना कोरोना संक्रमित फेला परिसकेका छन्। एकपछि अर्को गर्दै संक्रमित देखिन थालेपछि अवस्था नियन्त्रणबाहिर जाने आँकलनसहित स्थानीय प्रशासनले निषेधाज्ञा जारी गरेको हो।

सरकारले बाँकेका प्रमुख जिल्ला अधिकारी कुमारबहादुर खड्काको सरुवा गरेर रामबहादुर कुरुम्बाङलाई नयाँ प्रमुख जिल्ला अधिकारी बनाएर पठाएको छ।। बुधबार जिम्मेवारी सम्हालेलगत्तै प्रजिअ कुरुम्बाङले बाँकेमा अनिश्चितकालीन निषेधाज्ञा जारी गरेका हुन्।

जिल्लामा लकडाउनको पालना नभएकाले निषेधाज्ञा जारी गर्नुपरेको प्रजिअ कुरुम्बाङले बताएका छन्। बाँकेमा एकजना संक्रमितको मृत्युसमेत भइसकेको छ। बाँकेमा बुधबार मात्र थप १६ जनामा संक्रमण पुष्टि भएको छ।

जिल्लाका आठ स्थानीय तहमध्ये छ स्थानीय तहमा कोरोना संक्रमित भेटिएका छन्। जिल्लामा नरैनापुर गाउँपालिका कोरोना संक्रमणको केन्द्रविन्दु बनेको छ।

बाँकेका २२ जना कोरोना संक्रमित उपचारपछि निको भई घर फर्किएका छन्। तर, जिल्लामा संक्रमण रोकिन सकेको छैन।

कर्णालीमा सेना परिचालन तयारी

कर्णाली प्रदेश मन्त्रिपरिषद् बैठकले विश्वव्यापी महामारीको रुपमा फैलिरहेको कोभिड–१९ प्रतिकार्यमा खटाउन नेपाली सेना परिचालनका लागि नेपाल सरकारसँग अनुरोध गर्ने निर्णय गरेको छ।

भारतबाट आउने नेपाली नागरिकका कारण कर्णालीमा कोरोनाको महामारी फैलिएकाले त्यसलाई थप फैलन नदिन बैठकले सुरक्षा जनशक्ति परिचालन गर्ने निर्णय गरेको हो। बैठकले नेपाल प्रहरी र सशस्त्र प्रहरी बल सुरक्षा तथा अन्य कार्यसहित महामारीबाट प्रभावित र संक्रमित नागरिकको उद्धार तथा क्वारेन्टिन व्यवस्थापनमा देखिएको समस्या समाधान गर्न नेपाली सेनासमेत परिचालन गर्ने परिस्थितिमा स्वीकृतिका लागि नेपाल सरकारसँग अनुरोध गर्ने निर्णय गरिएको कर्णाली प्रदेशका भूमि व्यवस्था, कृषि तथा सहकारीमन्त्री एवं प्रवक्ता विमला केसीले जानकारी दिइन्।

पूर्वाधार विशेष कार्यक्रम कार्यान्वयनका लागि कर्णाली प्रदेश विनियोजन ऐन, २०७६ को दफा ९ बमोजिम बजेट कार्यान्वयन सहजताको लागि आदेश जारी गर्ने, कर्णाली प्रदेशमा व्यापार–व्यवसायको दर्ता तथा सञ्चालन तथा प्रदेश औद्योगिक व्यवसाय सम्बन्धमा व्यवस्था गर्न बनेको विधेयक प्रदेशसभामा पेश गर्न स्वीकृति प्रदान गर्ने निर्णय भएको मन्त्री केसीले बताइन्।

कर्णालीका सात सार्वजनिक बिदा राजपत्रमा प्रकाशन गरिने

कर्णाली प्रदेश सरकारको मन्त्रिपरिषद् बैठकले यस प्रदेशभित्र दिइने सात वटा सार्वजनिक बिदाको सूचनाका लागि राजपत्रमा प्रकाशन गर्ने निर्णय गरेको छ।

बैठकबाट बिदाका लागि गरिएको निर्णयको तिथिअनुसार दिइने बिदाको मिति आन्तरिक मामिला तथा कानून मन्त्रालयले तत्तत् समयमा निर्णय गरी सार्वजनिक गर्ने निर्णय भएको प्रवक्ता केसीले जानकारी दिइन्।

प्रवक्ता केसीका अनुसार धान दिवस असार १५ गते प्रदेशभर र चैत १२ गते जुम्लामा, साउन १ गते साउने सङ्क्रान्ति तथा देउडा पर्व, भदौ ४ गते प्रदेश स्थापना तथा शहीद दिवस, असोज कृष्ण त्रयोदशी चन्दनाथ मन्दिरको लिंगो बोक्ने मेला (जुम्लामा मात्र), माघ १ गते माघे सङ्क्रान्ति (माघी), चैत्र शुक्ल अष्टमी चैतेदशैँ प्रदेशभर मनाइने निर्णय भएको छ। त्यस्तै, फोत्तोलो ल्होसार सम्बन्धित समुदायको लागि मात्र बिदा हुने गरी बैठकले निर्णय गरेको उनको भनाइ थियो।