बुधबार एकैदिन थपिए ११४ नयाँ संक्रमित
काठमाडौं- बुधबार एकैदिन १ सय १४ जना कोरोना संक्रमित नेपालमा थपिएका छन् ।
स्वास्थ्य तथा जनसंख्या मन्त्रालयले दिएको जानकारी अनुसार नेपालमा थप १ सय १४ जना संक्रमित भेटिएका हुन् ।
बुधबार स्वास्थ्य तथा जनसंख्या मन्त्रालयको नियमित प्रेस व्रिफिङमा मन्त्रालयका प्रवक्ता डा. विकास देवकोटाले पछिल्लो २४ घण्टामा ११४ जनामा कोरोना संक्रमण पुष्टि भएको बताए।
बुधबार अहिलेसम्मकै सबैभन्दा उच्च संक्रमितको संख्या भेटिएको छ । यसअघि मंगलबार ९० जनामा संक्रमण पुष्टि भएको थियो।
योसँगै नेपालमा कुल संक्रमितको संख्या ८८६ पुगेको छ।
पछिल्लो चौबीस घण्टामा कोरोना भाइरसको पीसीआर विधिबाट ३ हजार ५ सय ८० नमुना परीक्षण गरिएको पनि उनले जानकारी दिए ।
मन्त्रालयका अनुसार देशैभरका क्वारेन्टाइनमा ७० हजार ३०५ जना छन् । पछिल्लो चौबीस घण्टामा २८ जना डिस्चार्ज भएका छन् । जसमा नारायणी अस्पतालबाट २१ जना, कोसी अस्पतालबाट तीन र सुशील कोइराला प्रखर अस्पताल बाँकेबाट चारजना डिस्चार्ज भएका छन् । हालसम्म कोरोना निको हुनेको संख्या एक सय ८३ जना पुगेको प्रवक्ता देवकोटाले जानकारी दिए ।