मेस्सी र फातीको कमाल : बार्सिलोनाको फराकिलो अग्रता « Himal Post | Online News Revolution
Logo

मेस्सी र फातीको कमाल : बार्सिलोनाको फराकिलो अग्रता



काठमाडौं- १७ वर्षे फरवार्ड अन्सु फाती र कप्तान लियोनल मेसीको गोलमा बार्सिलोनाले गएराति लेगानेसविरुद्ध २-० को नतिजा निकाल्दै स्पेनिस ला लिगाको शीर्ष स्थानमा पाँच अंकको अग्रता बनाएको छ।

फातीले जुनियर फिर्पोको पासमा ४२औं मिनेटमा गरेको गोलमा बार्सिलोनाले अग्रता लिएको थियो। जारी सिजन लिगमा फातीको यो पाँचौं गोल हो। फातीले गत २५ अगष्‍टमा १६ वर्ष २९८ दिनको उमेरमा बार्सिलोनाका लागि डेब्यू गरेका थिए। बार्सिलोनाको इतिहासमा डेब्यू गर्ने उनी दोस्रो कान्छा खेलाडी बनेका थिए। उनी सन् २०१२ देखि बार्सिलोना युथ एकेडेमीमा थिए।

क्याम्प नोउको खाली रंगशालामा मेसीले ६९औं मिनेटमा पेनाल्टीमा गोल गर्दै अग्रता दोब्बर बनाएका थिए। लेगानेसका रक्षक युनाई बुस्टिनजाले मेसीलाई फाउल गरेपछि बार्सिलोनाले पेनाल्टी अवसर पाएको थियो। जसलाई मेसीले कुनै गल्ति नगरी पोष्‍टको दिशा दिएका थिए। क्लब र देशका लागि गरेर मेसीको यो ६९९औं गोल हो। त्यसअघि ६४औं मिनेटमा एन्टोइन ग्रिजमनले गोल गरेका थिए। तर, भिडियो सहायक रेफ्री (भीएआर)ले त्यसलाई अफसाइड घोषित गरिदिएको थियो।

जितसँगै बार्सिलोनाले चीर प्रतिद्वन्द्वी रियाल मड्रिडलाई पाँच अंकले पछि पारेको छ। तथापि, रियालले एक खेल कम खेलेको छ। रियालले बिहीबार भ्यालेन्सियाविरुद्ध खेल्नेछ। लेगानेस २३ अंकका साथ अंक तालिकाको पुछारमा छ।