गजल-विजय योजित « Himal Post | Online News Revolution
Logo

गजल-विजय योजित



उफ्रेर जित्नुपर्ने खेलकाे नियम निकाले
पासाे तयार छ झर्न खुट्टाहरू उचाले ।

थाेत्राे लुगासरी हाे नाता टुटे पछाडि,
देखिन्छ लाज छाेडे टालाे देखिन्छ टाले ।

तालिम दिने महलकै मान्छे रहेछ सायद
संसार के हाे भन्दा पिँजडा भन्याे सुगाले ।

चुपचाप बेचिनेछ बस्तीहरूकाे माटाे
मान्छे तलाउ बन्ने साेचेर खन्नथाले ।

देखिन्छ चाेटजस्ताे लाग्याे झिकेर हेर्दा
छाेपेर राखियाे घाउ घाउमै बरु छुराले ।

मन्दिर पुगेर जुत्ता चप्पल लुकाउनेछन्
फेदी तिरै ज-जसले धुमधाम धूप बाले ।

भन्छन् सबै सुनामी आयाे गजलहरूकाे
तर्साइरहेछ शायर हानेर बाछिटाले ।

-विजय योजित
झापा, हाल दोहा कतार