भारतमा राष्ट्रपतिको निर्वाचन, द्रौपदी र यशवंत मध्ये को बन्ला ? - Himal Post Himal Post
  • २६ श्रावण २०७९, बिहीबार
  •      Thu Aug 11 2022

भारतमा राष्ट्रपतिको निर्वाचन, द्रौपदी र यशवंत मध्ये को बन्ला ?



काठमाडौं- भारतमा नयाँ राष्ट्रपति चयनका लागि आज मतदान हुँदैछ । हालका राष्ट्रपति रामनाथ कोविन्दको कार्यकाल २४ जुलाईमा समाप्त हुन लागेकाले नयाँ राष्ट्रपति चयनका लागि मतदान हुन लागेको हो ।

आज बिहान १० बजदेखि साँझ ५ बजेसम्म संसद भवन र राज्य विधानसभामा मतदान हुने र २१ जुलाईमा मत गणना हुने भारतीय मिडियाहरुले उल्लेख गरेका छन् । २५ जुलाईमा नयाँ राष्ट्रपतिको शपथ ग्रहण हुने छ ।

राष्ट्रपति पदका लागि सत्तारुढ भाजपाको तर्फबाट द्रौपदी मुर्मु र विपक्षीको तर्फबाट यशवन्त सिन्हा उम्मेदवार छन्। बीजेपी नेतृत्वको एनडीएले द्रौपदी मुर्मुलाई उम्मेदवार बनाएको छ। विपक्षी दलहरुले साझा उम्मेदवारमा यशवन्त सिन्हालाई अगाडी सारेका छन् ।
आज हुने मतदानको मतगणना ती दिन पछि जुलाई २१ (साउन ५) मा हुनेछ र नयाँ राष्ट्रपतिले जुलाई २५ मा सपथ लिनेछन्।

को हुन् यशवंत सिन्हा ?
यशवंत सिन्हा पहिले भारतीय जनता पार्टीकै नेता थिए । तर उनी अहिले भाजपा पार्टीबाट टाढा भइसकेका छन्। उनी प्रधानमन्त्री चन्द्र शेखरको कार्यकालमा १९९०-१९९१ बीच अर्थमन्त्री थिए।

उनी फेरि प्रधानमन्त्री अटल बिहारी वाजपेयीको नेतृत्वमा मार्च १९९८ देखि जुलाई २००२ को बीचमा वित्त मन्त्री भएका थिए । उनी जुलाई २००२ देखि मे २००४ सम्म विदेश मन्त्री थिए।

उनी मार्च १३,२०२१ मा अखिल भारतीय तृणमूल कांग्रेसमा सामेल भए । उनले अन्ततः जुन २१,२०२२ मा अखिल भारतीय तृणमूल कांग्रेस छोडे र संयुक्त विपक्षी राष्ट्रपतिको उम्मेद्वार बनेका हुन् ।

सिन्हा एक आईएएस अधिकारी हुन् । उनी १९६० मा भारतीय प्रशासनिक सेवामा सामेल थिए । र आफ्नो सेवा कार्यकालमा २४ वर्ष भन्दा बढी महत्त्वपूर्ण पदहरूमा बिताएका थिए ।

को हुन् द्रौपदी मुर्मु ?
मुर्मु पूर्वी भारतीय राज्य ओडिशाका पार्टीका आदिवासी नेता हुन्। उनको जन्म २० जुन १९५८ मा ओडिशाको मयुरभञ्ज जिल्लाको बैदापोसी गाउँमा भएको थियो।

उनी सन् २००० मा गठन भएदेखि पाँच वर्षे कार्यकाल (२०१५-२०२१) पूरा गर्ने झारखण्डको पहिलो गभर्नर हुन्। मुर्मु २००२ देखि २००९ सम्म मयुरभञ्जा जिल्लाको भाजपा जिल्ला अध्यक्ष भइन्। मुर्मुले शिक्षकको रूपमा आफ्नो करियर सुरु गरे। उनी सन् १९९७ मा ओडिशाको राजनीतिमा प्रवेश गरेकी थिइन् ।