निधार !!

-हेमन्त गिरी

सबैले भन्थे-
‘निधार ठुलो छ तेरो
भाग्यमानी छस् !’

कम्पनीमा
भाग्य अजमाउन
जाँदा र आउँदा
काँचका घरहरूमा
हेर्छु फर्की फर्की
आफ्नो आकृति !

सौ मन्जिला भित्ताहरूमा
रङ्ग पोतिरहँदा
पर..
रेगिस्तानको मिराजमा
देखिरहन्छु आफ्नो तस्बिर !

तातो पानीले नुहाइदिई वरी
कपालमा लिरिक्क तेल लगाइदिएर आमाले
टिलिक्क तालु टल्काइदिए झैँ,
टल्काउँछु भाँडाहरू निधार रसाउन्जेल
र
तिनमा हेर्छु भाग्यको ऐना !

आहा !!
कति ठुलो छ मेरो निधार !
खुसी हुनुको कुनै सीमा हुन्छ भने
त्यो नाघेर मक्ख पर्छु !
चिच्याएर भन्न मन लाग्छ उत्तिबेलै-
गोरू चराउने रामेलाई
गाडी चलाउने श्यामेलाई
झिँगा धपाउने शिवेलाई
अनि
मान्छे बेच्ने शंकरेलाई !
‘देख्यौ केटा हो मेरो भाग्य ?
यहाँ त सबथोक चिल्लै चिल्ला !
जे हेर्‍यो तिनै चिल्ला
चिल्लाहरूले जिल्ल पार्दै
देखाइदिन्छन् मेरो ठुलो निधार !’

कहिलेकाहीँ
साहूले सामान बोक्न
पछाडिको सिट ‘अफर’ गर्‍यो भने
झटपट सिसामा हेर्छु
मुसुक्क मुस्कुराउँछु
सलूट गर्छु सुस्तरी आफूले आफूलाई
र
बिस्तारै पन्छाउँछु
भाग्य छेक्ने चुल्ठोलाई
निधार बाट पछाडितिर !
उत्तिबेलै खलासी बिरेलाई
फोन गरेर भन्न मन लाग्छ,
‘कैलै कारको खलासी बनेको छस् लठूवा ?!’

यता दूरदेशमा,
थकान,सुस्केरा,निद्रा र चेतना..
अनौठा छन् यी साथीहरू मेरा !
थकान सँगै सुस्केरा आउँछ
तनावको तन्ना लिएर
अनि
चकचके चेतना आई बिथोल्न खोज्छ
निमुखो निद्रालाई !
भन्छ-
‘ए चाँदे,
कति मक्ख छस् हाउ जिन्दगीमा !?
बुझेको छस्-
कित्ता कित्तामा पलट्टिंग भइसक्यो तेरो निधार
र
बेचिइसके सबै प्लटहरू !

एक कित्ता-पासपोर्टको राजस्वको लागि
अर्को कित्ता- नेताको सर्वस्वको लागि
तेस्रो कित्ता- बाको अहंको लागि
चौथो कित्ता- आमाको दमको लागि
र
अन्तिम कित्ता सङ्गिनीको सुनको लागि..
बेचिइसक्यो केटो तेरो निधार सप्पै !’

त्यसो त
‘निधार ठुलो छ तेरो’ भनेर
बा-आमा-आफन्त र संगीसाथीले जगाइदिएको
विश्वासको अगाडी
कहाँ पत्याउँछु र म
फुच्चे चेतनाको कुरा !?

ठुलो स्क्रिन भएको मोबाइल
पठाइदिएको छु बालाई यसपालि दसैँमा !
बा भन्नुहुन्थ्यो,
घरको तलो बढ्यो भने
मेरो निधार
र
आफ्नो नाकको आकार
एकै पटक बढ्छ भनेर !

साइतको समय पारेर
साहूले नदेख्ने गरी टोइलेटमा लुकेर
ट्याक्क गर्नेछु भिडियो कल बा-आमालाई
ठुलो स्क्रिन भएको मोबाइलमा
र
पसार्ने छु स्क्रिनमा निधार
‘ल, बा-आमा साइतको टिको लगाइदेऊ’ भनी,
‘भाग्यका आशीर्वाद बर्साइदेऊ’ भनी !
ठुलो स्क्रिन भएको मोबाइलमा
मेरो निधार कत्ति ठुलो देखिएला हगि ?!

आमा टोलाइरहनेछिन्-
‘मेसिन खसेर लागेको
निधारको खत
अझै सन्चो भएनछ यसको’ भन्दै !
बाले आँखाका डिल भरी
पानी रोकेर भन्नेछन्-
‘निधार त ठुलै पाको होस् ठुले,
भाग्यमानी हुनू !

✍️हेमन्त गिरी