रवी लामिछानेले जितेको होइन मिडियाले यत्तिकै प्रचार गरे- केपी ओली - Himal Post Himal Post
  • २२ मंसिर २०७९, बिहीबार
  •      Thu Dec 8 2022

रवी लामिछानेले जितेको होइन मिडियाले यत्तिकै प्रचार गरे- केपी ओली



नेकपा (एमाले) का अध्यक्ष केपी शर्मा ओलीले रवी लामिछानेको पार्टीको उदय नभएको जिकिर गरेका छन् ।

उनले मिडियाले प्रचार मात्रै गरेको भन्दै यो मामूली विषय भएको बताए । लामिछानेको पार्टीले खासै नजितेको भन्दै मिडियाले यत्तिकै बढी प्रचार गरेको उनको आरोप थियो ।

ओलीले राज्य संयन्त्रको दुरुपयोग गरी बुथ कब्जा गर्ने प्रवृत्ति मौलाएको समेत बताएका छन्। उनले हेलिकप्टरबाट गुण्डा ओसारेर धाँधली गरेको आरोप लगाए ।

झापा क्षेत्र नम्बर ५ बाट प्रतिनिधिसभा सदस्यमा निर्वाचित भएसँगै विजय जुलुस मनाउन बिहीबार गृह जिल्ला आएका एमाले अध्यक्ष ओलीले भद्रपुर विमानस्थलमा सञ्चारकर्मीसँग गरेको संक्षिप्त कुराकानीमा यस्तो बताएका हुन्।

‘मतदानका क्रममा हेलिकोप्टरबाट गुन्डा ओसारेर आतङ्क मच्चाउने, तरबार लिएर गेटमा बस्ने कुरा चिन्ताको विषय बनेको छ,’ ओलीले भने, ‘सत्ता प्रायोजित गुन्डागर्दी, बुथ क्याप्चर, हिंसाजस्ता घटना अशोभनीय मात्र होइन, दुःखद र निन्दनीय पनि हो।’

लोकतन्त्रका निम्ति यी कुराहरू निक्कै चुनौतीपूर्ण भएको उनले बताए। ‘अभिमतले के परिणाम दियो त्यो आफ्नो ठाउँमा छ। जसलाई बलजफ्ती हराइएको छ वा हराउन खोजिएको छ। ‘त्यसप्रति मेरो असहमति छ,’ उनले भने।

राष्ट्रिय स्वतन्त्र पार्टीको उदय भएको प्रसङ्गमा सञ्चारकर्मीले राखेको जिज्ञासामा उनले भने, ‘यो कुनै ठुलो कुरा होइन, त्यो मामुली कुरा हो।’ ‘धेरै उदय भयो भनेर जस्तो प्रचारप्रसार गर्‍यो, वास्तवमा त्यो मिडियाको कृपा हो,’ उनले थपे।

यता भारी मतान्तरसहित विजयी बनेका ओली निर्वाचित भएको प्रमाण पत्र ग्रहण गर्न, मतदातालाई धन्यवाद दिन र विजय जुलुसमा सहभागी हुन दमकतर्फ प्रस्थान भइसकेका छन्।