भारत र पाकिस्तान : सात खेल, सातै जित « Himal Post | Online News Revolution
Logo

भारत र पाकिस्तान : सात खेल, सातै जित



एजेन्सी— रोहित शर्माको शतकमा भारतले विश्वकप क्रिकेटमा चिरप्रतिद्वन्द्वी पाकिस्तानलाई डकवर्थ लुइस पद्धतिमा ८९ रनले पराजित गरेको छ । विश्वकपमा भारतले पाकिस्तानमाथि सात खेल खेलेकोमा सबैमा विजय हात पारेको छ । यस विजयपछि भारत अंकतालिकाको तेस्रो स्थानमा उक्लेको छ ।

शर्माले तीन इनिङ्समा आफ्नो दोस्रो शतक बनाउने क्रममा १ सय ४० रन जोडेपछि टस हारेर ब्याटिङमा आएको भारतले ओल्ड ट्राफोर्डमा ३३६–५ को स्कोर बनायो । पाकिस्तानले ३५ ओभरमा ६ विकेट गुमाई १ सय ६६ रन बनाएको समयमा खेल वर्षाले बिथोलिन पुग्यो । त्यसपछि ४० ओभरमा झारिएको खेलमा पाकिस्तानलाई ३ सय २ रनको लक्ष्य दिइयो । पाकिस्तानले बाँकी ५ ओभरमा १ सय ३६ रन बनाउनुपर्ने भयो । पूरा ४० ओभर खेलेको पाकिस्तानले ६ विकेट गुमाई २ सय १२ रनमात्र बनाउन सक्यो ।
इमाद वासिम ३९ बलमा ४६ र सदाब खान १४ बलमा २० रन बनाई अविजित रहे । ओपनर इमाम उल हक ७ रनमै आउट भएका थिए । फखर जमानले ६२ र बाबर आजमले ४८ रन बनाउँदा पाकिस्तानको केही आशा देखिएको थियो । कुलदीप यादवले दुवैलाई आउट गरे । कुलदीपसँगै विजय शंकर र हार्दिक पाण्ड्याले २–२ विकेट लिए ।

यसअघि १ सय १३ बल खेलेका भारतका ओपनर शर्माले १४ चौका र ३ छक्का प्रहार गरे । शर्माले केएल राहुल (५७) सँग पहिलो विकेटमा १ सय ३६ रन जोडेका थिए । ७८ बल खेलेका राहुलले ३ चौका र २ छक्का प्रहार गरे ।

शर्मालाई कप्तान विराट कोहलीले ७७ रन बनाउँदै राम्रो साथ दिए । आफ्नो इनिङ्सका क्रममा कोहली एकदिवसीय अन्तर्राष्ट्रियमा सबैभन्दा चाँडो ११ हजार रन बनाउने खेलाडी बने । कोहलीले २ सय २२ इनिङ्समा यो उपलब्धि पूरा गर्दै आफ्नै देशका सचिन तेन्दुलकरले २ सय ७६ इनिङ्समा ११ हजार रन बनाएको कीर्तिमानलाई उछिनेका हुन् ।

पाण्ड्याले १९ बलमा २६ रन बनाए । पाकिस्तानको मोहम्मद आमिरले ४७ रन खर्चेर ३ विकेट लिए । उनलाई पिचमा दौडिएको कारण दुई पटक चेतावनी दिइएको थियो ।

स्कोर कार्ड
भारत डकवर्थ लुइस पद्धतिमा ८९ रनले विजयी

भारत
५० ओभर ३३६/५
रोहित शर्मा–१४०
विराट कोहली–७७
केएल राहुल–५७

मोहम्मद अमिर–३/४७
वाहब रियाज–१/७१

पाकिस्तान
४० ओभर २१२/६
फखर जमान–६२
बाबर आजम–४८

विजय शंकर–२/२२
कुलदिप यादव–२/३२
हार्दिक पाण्ड्या–२/४४