…यहाँ अझै धेरै गर्न बाँकी छ ! « Himal Post | Online News Revolution
Logo

…यहाँ अझै धेरै गर्न बाँकी छ !



सयाैँ पटक मैले पसिना र रगतको

सिँचाइ गरेर फलाएकी

छु एकमुठ्ठी सुनका

झोप्पाहरु

कयौं पटक बगाएकी छु

आँखाबाट झरना

मैले टुकी नभएको

उज्यालोमा चलाएकी

छु खुट्टा रेटिएका अपाङ्ग

कलम !

मैले ताराहरु बटुलेर

लेखेकी छु

धेरै पटक

माटोको नाम

मैले हिलाेको

गाजल लगाएको छु

धुलोको पाउडर घसेकी छु

निचोरेर एउटा लालिगुँरास

आेठको लालि हराउन दिएकी

पनि त छैन

मैले घाम नपुगेको

भुगोलमा पुगेर

कयौं रातहरु बिताएकी छु !

टिमुर पानीसँग परिचय छ

मेरो जिब्रोको

पत्थरसँग मित्रता छ

यी हातहरुको

पानीसँग रमाउँछ मेरो

पेट

खुट्टा नभएका पहाडहरुसँग

हिड्छ यो मन

आँखा नभएको बूढो

पीपलसँग जुनेली रातमा

संवाद गर्छन् यी आँखाहरु

हो, रहरहरु थुप्रै छन् यो मनमा

दु:खसँग घुलिएका जहरहरु

पनि छन्

पानीले पखाल्न नसकिने

पिरामिड जस्ता सफरहरु छ

तर विदेशीएको छैन मन

माटोको विछ्याैंनामा

हावाको सिरकसँग

मेरा पैतालाका डोबहरु

र मेरा पसिनाहरु !

सागरहरु भएको

माटोमा मस्त निदाई

रहेछु म

यो माटो मेरो हो

यो देश मेरो हो म मनै हुँ

लाग्छ मैले यहाँ

अझै धेरै गर्न बाँकी छ !!!!!