सुरेन्द्र पाण्डेले मागे अर्थमन्त्री जनार्दन शर्माको राजीनामा - Himal Post Himal Post
  • १५ चैत्र २०८०, बिहीबार
  •      Thu Mar 28 2024
Logo

सुरेन्द्र पाण्डेले मागे अर्थमन्त्री जनार्दन शर्माको राजीनामा



काठमाडौँ– नेकपा एमालेका सांसद सुरेन्द्र पाण्डेले अर्थमन्त्रीमाथि गम्भीर प्रश्न उठेकाले मन्त्री पदबाट राजीनामा दिनुपर्ने बताएका छन् । मंगलबारको संसद बैठकको विशेष समयमा बोल्दै उनले यस्तो बताएका हुन् ।

‘खासगरी करको विषय ज्यादै गोपनीय विषय हो,’ उनले भने, ‘राष्ट्रिय सुरक्षा जस्तै विषय हो । स्वार्थको विषय हो । यस्ता गोपनियताहरु बाहिर सार्वजनिक गर्ने, गोपनियताहरुमा साँठगाँठ र मिलेमतो गर्ने जस्ता कुराहरू गम्भिर अपराध मानिन्छन् । यसबारेका छानबिन हुनुपर्छ र संसदले यसबारेमा कदम चाल्नुपर्छ । यसको जवाफ हामी चाहान्छौँ । मन्त्रीले नैतिक हिसाबले त्यो जिम्मेवारीमा बस्न मिल्दैन भन्ने मलाई लाग्छ ।’

सांसद पाण्डेले बजेट निर्माणको शिलशिलामा बजेट निर्माणमा अनाधिकृत मानिसहरूसँग साँठगाँठ गरेर करको दरमा तलमाथि गरिएका कुराहरू सार्वजनिक भएको भन्दै अर्थमन्त्री माथि प्रश्न उठेको बताए । उनले यस विषयमा अर्थमन्त्रीले संसद्मा प्रष्ट नपारेको भन्दै आपत्ति जनाए ।

‘यस सन्दर्भमा नेकपा एमालेको तर्फबाट हामीले गम्भीरतापूर्वक प्रश्न खडा गरेका थियौँ,’ उनले भने, ‘तर यति गम्भिर विषयको यति गम्भीरताका साथ प्रश्न खडा गरिसकेपछि अर्थमन्त्रीले आएर यस विषयमा संसदमा आएर कुनै प्रष्ट पार्नु भएन । यो ज्यादै आपत्तिजनक कुरा हो ।’

सांसद पाण्डेले अर्थमन्त्रालय भित्रको अभ्यासमा बजेट संसदमा प्रस्तुत एकदिन भन्दा अगाडि अघिल्लो दिनसम्म अर्थमन्त्रालयका कर्मचारीहरु बाहेक कसैलाई पनि प्रवेश नदिइने प्रावधान रहेको बताए । तर अर्थमन्त्रीले मध्यरातमा अपरिचित व्यक्तिलाई डाकेको भन्दै उनले यसको जानकारी मागे ।

‘अर्थमन्त्रीले मध्यरातमा अपरिचित व्यक्तिलाई अर्थमन्त्रालयमा डाक्नुभयो,’ उनले भने, ‘मन्त्रालयका सचिव सहित विभिन्न व्यक्तिहरू सरोकारवाला व्यक्तिलाई राखेर करका विज्ञहरू उहाँ हुनुहुन्छ । उहाँहरूले भनेअनुसार गर्नु भने र निर्देशन गर्नुभयो भन्ने कुरा आएको छ । यो कुरा के हो ? आयत गरेका सामानमा ९० प्रतिशत छुट दिने र नेपालका उद्योगहरूलाई सुुकाउने गरेर साढे सात प्रतिशत कर लगाउने जुन नीति उहाँले गर्नुभएको छ ।

यो कस्तो किसिमको संलग्नता र साँठगाँठमा भएको हो । यसको जानकारी चाहियो संसदलाई ।’सांसद पाण्डेले यस्तो गम्भिर प्रश्न उठेपछि यसमा प्रधानमन्त्रीको पनि जवाफदेहिता हुन्छ कि हुँदैन भनेर प्रश्न गरे ।