धोनीको लागि आईपीएल फलामको चिउरा « Himal Post | Online News Revolution
Logo

धोनीको लागि आईपीएल फलामको चिउरा



एजेन्सी– भारतका पूर्व कप्तान तथा विकेटकिपर महेन्द्र सिंह धोनी यतिबेला राष्ट्रिय टोलीमा छैनन् । इंग्ल्यान्डमा सम्पन्न आईसीसी एकदिवसिय विश्वकप सेमिफाइनलमा न्युजिल्यान्डसँग रन आउट भएयता धोनीको भविष्यमाथि प्रश्न उठेको छ ।

दुइ महिना आर्मीको तालिम र अन्य समय धोनीले पारिवारसँग बिताएका छन् ।

सेमिफाइनलमा जितका लागि २ सय ४० रनको लक्ष्य पछ्याउने क्रममा भारतलाई विश्वकप फाइनलमा स्थान बनाउन अन्तिम १२ बलमा ३१ रन आवश्यक थियो ।

धोनी क्रिजमा हुँदै आशा भरोसा सबै उनी माथि थियो । यस्तै परिस्थितिमा धोनीले थुप्रै पटक खेल जिताएका थिए ।

तर ४९ औं ओभरको तस्रो बलमा दुई रन लिनेक्रममा मार्टिन गुप्टिलले सिधै स्टम्प ताकेपछि धोनी गहभर आसु निकाल्दै ब्यक्तिगत ५० रनमा पेभिलिएन फर्केका थिए । धोनीको रन आउटको निर्णय दिन थर्ड अम्यापरलाई केहि समय लागेको थियो ।

धोनी आउट भएसँगै भारतको जितको सम्भावना सकिंदा १८ रनले पराजित हुँदै बाहिरिएको थियो । त्यहि हारको पिडाको कारण धोनीले भारतीय छनोट समितीलाई केहि समय आफु उपलब्ध हुन नसक्ने भन्दै मैदान बाहिर रहे ।

गत माघमा भारतीय क्रिकेट कन्ट्रोल बोर्ड (बीसीसीआई) ले सार्वजनिक गरेको २०२० को खेलाडी सुचिमा धोनी परेनन् । त्यसैले धेरैले धोनीको अन्तर्राष्ट्रिय क्रिकेट यात्रा समाप्त भएको बताउँछन् ।

धोनीको विषयमा बीसीसीआई पनि मौन छ । चेन्नई सुपर किंग्सका कप्तान समेत रहेका धोनी चैत्र १६ देखि सुरु हुने १३ औं संस्करणको इन्डियन प्रिमियर लिग (आईपीएल) को लागि प्रशिक्षणमा लागि सकेका छन् ।

धोनीले अभ्यासको क्रममा एकै ओभरमा पाँच छक्का प्रहार गर्दै उत्कृष्ट पुनरागमन गर्ने संकेत दिएका छन् ।

भारतीय छनोट समितीका सुनिल जोशीले पनि आईपीएलमा राम्रो प्रर्दशन गरे धोनीले टोलीमा पुनरागमन गर्न सक्ने बताउँछन् ।

‘धोनीले पुनरागमन गर्न आईपीएलमा राम्रो प्रर्दशन गर्नुपर्छ, धोनी मात्र होइन अन्य सिनियर खेलाडीले पनि राम्रो प्रर्दशन गरे पुनरामगन गर्न सक्छन्’, उनले भने । बीसीसीआईका अध्यक्ष सौरभ गांगुलीले यस विषयमा धोनीलाई आफैं सोच्न दिनुपर्ने बताउँदै आएका छन् ।

एकदिवसिय, टि ट्वान्टी र च्याम्पियन्स ट्रफीको उपाधि दिलाएका धोनी भारतलाई विश्वकप जिताउँदै आफ्नो क्रिकेट करिअर अन्त्य गर्न चाहान्छन् । धोनीले आगमी अक्टोबरमा अष्ट्रेलियामा हुने टि ट्वान्टी विश्वकप खेल्ने इच्छा राखेको बुझिएको छ ।

यता विकेटकिपर ऋषभ पन्तको प्रर्दशन पछिल्लो समय राम्रो छैन । पन्तको खराब प्रर्दशनको कारण न्युजिल्यान्डसँगको तीन एक दिवसिय र पाँच टि२० सिरिजमा लोकेश राहुलले विकेटकिपरको भुमिका निर्वाह गरेका थिए । पन्तको सट छनोटलाई लिएनै निकै आलोेचना हुँदै आएको छ ।

खराब प्रर्दशनको कारण न्युजिल्यान्डसँगको पाँच टि२० मा पन्त बाहिर रहेका थिए । त्यसैले धेरै क्रिकेट विज्ञ र खेलाडी भारतीय टोलीलाई धोनीको आवश्यक अझै रहेको बताउँछन् ।

प्रशिक्षक रवी शास्त्रीले पनि विश्वकपमा स्थान बनाउन धोनीले आईपीएलमा राम्रो प्रर्दशन गर्नु पर्नेमा जोड दिएका छन् । त्यसैले धोनीको भविष्य आईपीएलको प्रर्दशनमा निर्भर रहने देखिन्छ ।