आइपिएल: फेरि हार्यो दिल्ली डियरडेभिल्स, सन्दीप टिममा अटाएनन
इन्डियन प्रिमियर लिग (आइपिएल) क्रिकेट अन्तर्गत बुधबार बेलुका भएको खेलमा राजस्थान रोयल्स विजयी भएको छ । ११ औँ संस्करणको पहिलो खेलमा पराजित भएको राजस्थानको यो पहिलो जित हो ।
राजस्थानले दिल्ली डियरडेभिल्सलाई डकबर्थ लुइस नियमका आधारमा १० रनले हराएको हो । वर्षाले प्रभावित जयपुरमा भएको खेलमा पहिले ब्याटिङ गरेको राजस्थानले १७ ओभर पाँच बलमा पाँच विकेटको क्षतिमा १५३ रन बनायो ।
दिल्लीले डकबर्थ लुइस नियमका आधारमा ६ ओभरमा ७१ रन बनाउनु पर्ने लक्ष्य पायो । तर उसले निर्धारित ओभरमा चार विकेटको क्षतिमा मात्रै ६० रन बनाउन सक्यो ।
दिल्लीका लागि क्रिस मोरिसले ७ बलमा नटआउट १७ तथा ऋशव पन्तले १४ बलमा २० रन बनाए । यस्तै ग्लेन म्याक्सवेलले १२ बलमा १७ रनको योगदान दिए पनि जित दिलाउन सकेनन् ।
नेपालका सन्दीप लामिछाने अनुबन्धित भएको टिम दिल्लीको यो दोस्रो हार हो । लामिछाने दुवै खेलमा प्लेइङ्ग इलाभेनमा परेका छैनन् ।
यसअघि पहिले ब्याटिङ्ग गरेको राजस्थानले अजिन्क्या राहाणेको ४५ तथा सन्जु सामसोनको ३७ रनको सहयोगमा १७ ओभर ५ बलमा १५३ रन बनाएको थियो ।