ओलीको पक्षमा आन्दोलन गर्ने नेकपा कार्यकर्तालाई कारबाही गरिने - Himal Post Himal Post
  • ६ चैत्र २०८०, मंगलवार
  •      Tue Mar 19 2024
Logo

ओलीको पक्षमा आन्दोलन गर्ने नेकपा कार्यकर्तालाई कारबाही गरिने



काठमाडौं- प्रधानमन्त्री ओलीको पक्षमा सडकमा प्रदर्शन गर्ने नेकपाका कार्यकर्तालाई कारबाही हुने भएको छ । युवा संघका केन्द्रीय अध्यक्ष रामप्रसाद सापकोटा ‘दीपशीखा’ले सरकारको समर्थनमा प्रदर्शनमा उत्रिएका युवा संघका नेता तथा कार्यकर्तालाई कारबाही गर्ने चेतावनी दिएका हुन् ।

विधि, विधान, पार्टी नमान्ने र गैरकानुनी बाटो अगुवाहरुले रोज्नु नहुने भन्दै दीपशिखाले कारबाही गर्ने चेतावनी दिएका हुन् । उनले प्रधानमन्त्री केपी शर्मा ओलीको समर्थनमा उत्रिएका युवाहरु युवासंघका नेता तथा कार्यकर्ता भए उनिहरुलाई कारबाही गर्ने चेतावनी दिएका हुन् ।

‘पार्टी बैठक छोडेर सडकमा गरिने प्रदर्शन किमार्थ स्विकार्य छैन । पहिलो त विधि, विधान, पार्टी नमान्ने र गैरकानुनी बाटो अगुवाहरुले रोज्नु हुँदैन । दोस्रो कोरोनाका कारण मुलुक नै लकडाउन र सामाजिक दुरी कायम गर्नगराउन भूमिका खेल्नुपर्ने सत्तापक्षका हामीले सडक रोज्नु लज्जाको विषय हो’, उनले भने, ‘आज समर्थनको जुलुश खोज्दा भोलि विरोधको जुलुश लाग्यो भने चै के गर्ने ? कसैसँग उत्तर छ ? आन्दोलनमा होमिएका युवालाई कराबाही गरिन्छ ।’

मध्यरातमा बालुवाटार बोलाएर प्रधानमन्त्री केपी शर्मा ओलीको निर्देशन दिएपछि सरकारको समर्थनमा आज युवाहरुले देशका विभन्न ठाउनमा प्रदर्शन गरेका थिए ।

युवाहरुको समूहले ‘सरकार ढाल्न पाइँदैन’, ‘आज होइन भोलिलाई, हाम्रो समर्थन ओलीलाई’ भन्दै माइतीघर मण्डलासहित देशका विभिन्न स्थानमा प्रदर्शन गरेका थिए ।

सत्तारुढ नेपाल कम्युनिस्ट पार्टी (नेकपा)को स्थायी कमिटीका बहुमत सदस्यले ओलीले प्रधानमन्त्री र अध्यक्ष दुबै पदबाट राजीनामा दिनुपर्ने माग भइरहेका बेला समर्थकहरु सडकमा उत्रिएका हुन् ।