आफैले ल्याएको रेल चढेर खुसीले गदगद छन् ओली - Himal Post Himal Post
  • १७ मंसिर २०७९, शनिबार
  •      Sat Dec 3 2022

आफैले ल्याएको रेल चढेर खुसीले गदगद छन् ओली



जनकपुरधाम- नेकपा एमालेका अध्यक्ष एवं पूर्व प्रधानमन्त्री केपी शर्मा ओलीले आफैँले ल्याएकाे रेल चढ्दा निकै खुसी लागेकाे बताएका छन् ।

शनिबार लाेसपाका प्रमुख सचेतक उमाशंकर अरगरियालाई पार्टी प्रवेश गराउन धनुषाकाे तिनकैरिया जान जनकपुरधामबाट महिनाथपुर जाने क्रममा रेल चढेका बेला सञ्चारकर्मीहरूसँग कुरा गर्दै खुसी व्यक्त गरेका थिए ।

उनले भने, ‘आज हामीले नै ल्याएकाे ट्रेनमा बसेर आरामदायी यात्रा गर्न सकिरहेका छौं । खुसी नलाग्ने कुरै भएन । यो अत्यन्तै खुसीको कुरा हो । यो हाम्रै पालामा ल्याएकाे रेल हो, त्यसैले धेरै खुसी छु ।’

उनले एमाले नेतृत्वको सरकारकै पालामा विकासको काममा देश द्रुत गतिमा अगाडि बढेको दाबी समेत गरे । उनले एमाले नेतृत्वकाे सरकारमा ‘हामीले हुलाकी राजमार्ग बनायौं, कोसी मरिन डाइभर्सन बनायौं,’ जसले गर्दा अहिले १ लाख ८५ हजार मधेसको जमिन सिँचाइ सदुपयोग भइरहेको बताए ।

अध्यक्ष ओलीले सघन सहरी विकास कार्यक्रम, जनकपुर ढल विकास आयोजना लगायतका थुप्रै कार्यक्रमहरू ल्याएर विकासमा अनेक हिसाबले सफलता साथ अगाडि एमाले बढेको बताए ।

उनीसंगै सचिव रघुवीर महासेठ, प्रभु साह र जुली महताे लगायत एमालेका सयाैँ नेता कार्यकर्ता रेल यात्रा गरेका थिए । एमालेका नेता कार्यकर्ताहरूले एसी बगीको ५६ र जेनरल बगीको ८६ वटा गरी कूल १४२ वटा टिकट काटेका थिए ।