जसपा उपेन्द्र समुहले पाउने पक्का, महन्थको छटपटी बढ्यो « Himal Post | Online News Revolution
Logo

जसपा उपेन्द्र समुहले पाउने पक्का, महन्थको छटपटी बढ्यो



काठमाडौं- सबै तर्फबाट संकटमा परेपछि जनता समाजवादी पार्टी नेपाल (जसपा)का अध्यक्ष महन्थ ठाकुर सर्वोच्चको ढोकामा पुगेका छन् ।
निर्वाचन आयोगले जसपाको आधिकारिकता उपेन्द्र यादव समुहलाई दिने देखेपछि पहिले पार्टी विभाजन गर्न तयार भएका ठाकुर अहिले भने विभाजन रोक्ने भन्दै सर्वोच्चमा पुगेका छन् ।

पार्टी विभाजन र आधिकारिकताको निर्णय रोक्ने आदेशको माग गर्दै सर्वोच्च अदालतमा रिट निवेदन दायर गरेका छन्। बिहीबार निर्वाचन आयोगले यही साउन ११ गते कार्यकारिणी समिति सदस्यलाई बोलाउने आदेश सुनाएपछि आज अध्यक्ष ठाकुरले उक्त रिट निवेदन दायर गरेका हुन्।

निर्वाचन आयोगले आधिकारिकताको विवादमा जसपाका कार्यकारिणी समिति सदस्यलाई परिचयपत्रको सक्कलप्रतिसहित उपस्थित हुन आदेश गरेको थियो। जसपामा भएका दुई अध्यक्ष उपेन्द्र यादव र ठाकुरमध्ये कार्यकारिणी समितिमा यादवको बहुमत देखिएको र अध्यक्ष ठाकुर पक्षको दाबी नै नपुग्ने देखिएपछि आफ्नो पार्टीको विभाजन र आधिकारिकताको निर्णय तत्काल रोक्न आदेशका माग गरिएको छ।

रिट निवेदनमा आफूले कारबाही गरेपछि संशोधन गरेको कार्यकारिणी समितिलाई मान्यता दिनुपर्नेमा आयोगले हकदैया नै नभएको विषयवस्तुमा प्रवेश गरेको उल्लेख छ।