दसैंलाई हवाई टिकट सकियो

काठमाडौं । वर्षेनी दसैंका बेला यात्रुलाई हवाई जहाजको टिकट पाउन सकस हुन्छ । वायुसेवा प्रदायक कम्पनीले दसैं आउन एक महिनाअघि नै हवाइजहाजको टिकट बुकिङ पूर्ण भइसकेको बताउँछन् । यही बहानामा दसैंको मौका छोपेर निजी हवाईकम्पनीले यात्रुको ढाड सेक्नेगरी भाडा असुल्ने गरेका छन् । महँगो टिकटसमेत पाउन यात्रुलाई मुश्किल हुन्छ ।

हरेक वर्ष दसैं आउनासाथ राजधानी काठमाडौंलाई कर्मथलो बनाएका लाखौं नागरिक घर जाने चटारोमा हुन्छन् । यात्रुका लागि घर फर्कन दुई विकल्प छन् । हवाई र सडक यातायात प्रयोग गरी यात्रु आ–आफ्नो गन्तब्यतर्फ लाग्छन् । विगतझैँ यस वर्ष पनि दसैंमा घर फर्कन यात्रुले उही सास्ती खेप्नुपरेको छ । सबैजसो वायुसेवा कम्पनीले दसैंको टिकट सकिएको बताएका छन् । यात्रुले महँगो शुल्क तिरेर पनि टिकट पाउन सकेका छैनन् ।

वायुसेवा कम्पनीले दसैंको मुखमा हरेक वर्ष झण्डै दोब्बर हवाईभाडा बढाउँदै आएका छन् । सडक पूर्वाधार अभावका कारण यात्रुले हवाई यात्रा गर्नुपर्ने बाध्यता छ । महङ्गो भाडा तिरेर भए पनि सहज र आरामदायी यात्राका लागि यात्रु लालायित हुन्छन् । उनीहरुले दसैंमा हरेक वर्ष पीडा भोग्नु पर्छ । अहिले पनि दसैंका लागि हवाइजहाजको टिकट पाउन कठिन भएको छ । पाए पनि दोब्बर भाडा तिर्नुपर्ने बाध्यता छ ।

पोखरा जान सामान्य अवस्थामा रु एक हजार ८०० सम्म भाडा तिर्नु पर्छ । अहिले दसैंमा पाँच हजारभन्दा बढी भाडा तिर्नुपरेको छ । यस्तै विराटनगरका लागि हवाइभाडा अन्य बेला रु तीन हजार २०० सम्म पर्छ । यात्रुले अहिले सात हजारभन्दा बढी भाडा तिर्दै आएका छन् । धनगढी र नेपालगञ्ज गन्तब्यमा जान ठिक्क परेका एक यात्रुले भने, ‘वायुसेवा कम्पनीलाई अहिले दसैं लागेको छ, बसको टिकट पाउन नसकेपछि रु आठ हजार तिरेर जहाजको टिकट किने ।’

अहिले यात्रुले धनगढीका लागि १२ हजारभन्दा बढी भाडा तिर्नु परिरहेको छ । नेपाल वायुसेवा निगमको जहाजमा भने धनगढीका लागि पाँच हजार ७०० मा टिकट खरीद गरेको अर्का एक यात्रुले बताउनुभयो । निगमले आफ्नो नियमित भाडादरमै गन्तब्यमा उडान भर्दैआएको छ । निगमका सहायक प्रवक्ता सुलेख मिश्रले दसैंमा पनि निगमले नियमित भाडादरमै टिकट बिक्री गरिरहेको जानकारी दिए ।

यात्रुलाई मात्र हैन वायुसेवा कम्पनीलाई पनि कम्ति चुनौती छैन । भाडा बढाएरै भए पनि उडान व्यवस्थापन र माग अनुसारको सेवा दिन दसैंका बेला हम्मेहम्मे पर्छ । एक वायुसेवा कम्पनीका सञ्चालकले भने, ‘हामीलाई दसैंमा सधैँ भाडा बढायो भन्ने आरोप लाग्छ, हाम्रो बाध्यता कसैले बझ्दैन् । सस्तो, महङ्गोको त कुरै छैन, टिकट पाउन कठिन छ, वायुयानको विविध खर्चको कुरा गरी साध्य छैन ।’

वायुसेवा कम्पनी भन्छन्ः दसैंलाई टिकट सकियो

दसैं आउनु एक महिना अघिदेखिनै हवाइजहाजको टिकट बुकिङ हुन्छ । यात्रुलाई घटस्थापना पछिका दिनमा धेरै टिकट चाहिन्छ । टिकट पाउन मुस्किल हुन्छ । पहिल्यै टिकट बुकिङ सकिएको हुन्छ । निजी क्षेत्रको अग्रणी वायुसेवा प्रदायक कम्पनी यती एयरलाइन्सले दसैंको हवाइटिकट सबै सकिएको जनाएको छ । यो समय उडान हुने प्रायः सबै गन्तब्यमा हवाइयात्रुको चाप छ । यतीले आफ्ना पाँच एटिआर र पाँच साना गरी १० तथा भगिनी संस्था तारा एयरका छ जहाजबाट आन्तरिक उडान भर्दै आएको छ । भद्रपुर, विराटनगर, जनकपुर, भैरहवा, पोखरा, नेपालगञ्ज, धनगढीलगायत गन्तब्यमा हवाइजहाजको टिकट सकिएको छ । अरु बेला पनि व्यस्त रहने यि गन्तब्यमा दसैंका बेला हरेक वर्ष हवाई यात्रुको चाप हुने गर्छ ।

निजी क्षेत्रको अर्को ठूलो वायुसेवा कम्पनी बुद्ध एयरले पनि दसैंका लागि अधिकांश गन्तब्यमा टिकट बुकिङ भइसकेको जनाएको छ । कम्पनीका अनुसार तुम्लिङ्टार र सुर्खेत गन्तब्यमा एक साता अघि नै बुकिङ पूरा भइसकेको छ भने बाँकी गन्तब्यमा ९० प्रतिशत बुकिङ भइसकेको छ । बुद्ध एयरसँग आन्तरिक उडानमा रहेका १३ जहाज मध्ये ११ एटिआर र दुई साना जहाज छन् ।

आन्तरिक उडानको प्रतिस्पर्धी कम्पनी श्री एयरलाइन्सको पनि दसैंका लागि टिकट सकिएको छ । कम्पनीसँग आन्तरिक उडानका लागि ७० सिट क्षमताका दुई तथा ५० सिट क्षमताका दुई जहाज छन् । त्यस्तै आन्तरिक उडानका सौर्य, सीता र सिम्रिक एयरलाइन्सको पनि दसैंका लागि टिकट बुकिङ सकिएको छ । दसैंमा यात्रुको अत्यधिक चाप बढेकाले उडान व्यवस्थापन तथा थप विस्तार गर्न लागि परेको हवाइसेवा प्रदायक कम्पनीको छाता सङ्गठन नेपाल वायुसेवा सञ्चालक सङ्घले जनाएको छ । सङ्घका प्रवक्ता योगराज कँडेल शर्माले पछिल्लो थानकोट–नागढुङ्गा सडक जामका कारण वायुसेवा कम्पनीलाई असाध्यै दबाब परेको भन्दै विमान कम्पनीले गन्तब्यमा उडान सङ्ख्या थप्ने तयारी गरेको छ ।

दसैंलाई लक्ष्य गरी अहिले सबै वायुसेवा प्रदायक कम्पनीको नियमित उडानमा शतप्रतिशत टिकट बुकिङ भइसकेको छ । यात्रुको चापलाई मध्यनजर गर्दै उडान सङ्ख्या बृद्धि गरिने जनाइएको छ । सङ्घका अनुसार आन्तरिक उडानमा १० हेलिकोप्टर कम्पनीसहित १८ वायुसेवा प्रदायक कम्पनीले उडान भर्दै आएका छन् । बुद्धएयर, यती एयरलाइन्स, श्री एयरलाइन्स, सौर्य एयरलाइन्स, सीता एयर, सिम्रिक एयरलाइन्स, समिट एयर र तारा एयरले आन्तरिक उडान भर्दैआएका छन् ।