‘नक्कली राजकुमार’का सबै कार्यक्रम सरकारले रोक लगायो
काठमाडौं- व्यवसायी तथा एमालेका केन्द्रीय सदस्य दुर्गा प्रसाईंको निमन्त्रणामा नेपाल आएका दुबईका नक्कली राजकुमार शेख मोहम्मद माक्तुम जुमा ला माक्तुमको सबै कार्यक्रम रोकिएका छन् ।
चार दिने भ्रमणमा आएका उनको सबै औपचारिक कार्यक्रममा सरकारले रोक लगाएको हो । सरकारी संयन्त्रलाई जानकारी नदिइ औपचारिक कार्यक्रममा सहभागी भएको र हुन लागेको भन्दै गृह मन्त्रालयले माक्तुमका लागि तय गरिएका सबै कार्यक्रमहरुमा रोक लगाएको हो ।
सुरक्षा संवेदनशीलताको दृष्टिमा विदेशबाट उच्च तहको पाहुना आउँदा सरकारसँग स्वीकृति लिनुपर्ने तर अनुमति नलिइ माक्तुमको कार्यक्रमहरुमा तय गरिएको भन्दै सरकारले रोक लगाएको हो ।
माक्तुम तीन दिने नेपाल भ्रमणबारे परराष्ट्र मन्त्रालयलाले हालसम्म कुनै जानकारी पाएको छैन । यस्ता भ्रमणमा परराष्ट्र मन्त्रालयलाई जानकारी दिनुपर्ने व्यवस्था रहेको छ ।
माक्तुम चार दिने नेपाल भ्रमणका लागि शनिबार काठमाडौं आएका हुन् । सरकारलाई जानकारी नगराइ तय गरिएको भ्रमणमा आएका माुक्तुम त्रिभुवन अन्तर्राष्ट्रिय विमानस्थलमा ओर्लेर सिधै झापा पुगेका छन् ।
माक्तुमले विमानस्थलमा उत्रिएलगत्तै व्यवसायी प्रसाईंलाई सुनको जस्तो देखिने लौरो उपहार दिएसँगै एकाएक चर्चा चलेको थियो । सँगै उनलाई दुबईका राजकुमारको रुपममा चर्चा गरिएको थियो । तर, उनी राजकुमार नरहेर दुबईका राजपरिवारका टाढाको नातापर्ने व्यक्ति रहेको बुझिएको छ ।